Kuwait Traffic Law: പ്രവാസികള്‍ക്ക് ഉള്‍പ്പെടെ കുവൈത്തിലെ ഗതാഗതനിയമത്തില്‍ മാറ്റം; പരിഷ്കരണം 48 വര്‍ഷം പഴക്കമുള്ള ചട്ടങ്ങള്‍
Kuwait Traffic Law കുവൈത്ത് സിറ്റി: രാജ്യത്ത് 48 വര്‍ഷം പഴക്കമുള്ള ഗതാഗതനിയമത്തില്‍ മാറ്റം വരുന്നു. ഏപ്രില്‍ 22 മുതല്‍ നിയമം പ്രാബല്യത്തില്‍ വരും. ഏപ്രില്‍ 21 വരെ മാത്രമേ നിലവിലെ നിയമത്തിന് സാധുതയുള്ളൂ. പ്രവാസി താമസക്കാർക്ക് സ്വന്തം പേരിൽ ഒന്നിലധികം വാഹനങ്ങൾ വേണ്ടെന്ന കർശനവ്യവസ്ഥകളും ശിക്ഷാനടപടികളും ഉൾപ്പെടുന്നതാണ് കുവൈത്തിന്‍റെ പുതിയ ഗതാഗതനിയമം. കോടതിയിലേക്ക് കൈമാറാത്ത ലംഘനങ്ങള്‍ക്ക് മന്ത്രാലയമാണ് സാമ്പത്തിക ഒത്തുതീര്‍പ്പുണ്ടാക്കാം. ഗതാഗതലംഘനങ്ങള്‍ക്ക് നിലവിലെ പിഴത്തുക രണ്ട് മുതൽ മൂന്നിരട്ടി വരെ വര്‍ധിപ്പിച്ചിട്ടുണ്ട്. നിയമലംഘകര്‍ക്ക് ജയില്‍ ശിക്ഷ കടുപ്പിപ്പിക്കുകയും ചെയ്തു. പുതിയ നിയമം അനുസരിച്ച്, ഏറ്റവും കൂടിയ പിഴത്തുക 5000 കുവൈത്ത് ദിനാറാണ്. മദ്യത്തിന്‍റെയോ മയക്കുമരുന്നിന്‍റെയോ ലഹരിയില്‍ വാഹനമോടിച്ച് ഗുരുതരമായ പരിക്കിനോ മരണത്തിനോ ഇടയാക്കുന്ന അപകടങ്ങള്‍ക്കാണ് ഈ വന്‍ പിഴത്തുക ഈടാക്കുക. പിഴത്തുകയ്ക്ക് പുറമെ അഞ്ച് വര്‍ഷം വരെ തടവുശിക്ഷയ്ക്കും വിധിക്കും. നിരോധിത സ്ഥലങ്ങളില്‍ വാഹനം പാര്‍ക്ക് ചെയ്യുന്നതിന് ഈടാക്കുന്ന 15 കുവൈത്ത് ദിനാര്‍ ആണ് പുതിയ നിയമത്തിലെ ഏറ്റവും കുറഞ്ഞ പിഴത്തുക.
മദ്യപിച്ചോ മയക്കുമരുന്ന് ഉപയോഗിച്ചോ വാഹനമോടിച്ചാല്‍ 1,000 കുവൈത്ത് ദിനാര്‍ മുതല്‍ 3,000 വരെ പിഴയും പരമാവധി രണ്ട് വര്‍ഷം വരെ തടവുമാണ് ലഭിക്കുക. വാഹനമോടിച്ച് പൊതു, സ്വകാര്യ വസ്തുക്കള്‍ നശിപ്പിച്ചാല്‍ പരമാവധി 3,000 കുവൈത്ത് ദിനാര്‍ പിഴയും മൂന്ന് വര്‍ഷം വരെ തടവും ലഭിക്കും. ഡ്രൈവിങ്ങിനിടെ മൊബൈല്‍ ഫോണ്‍ ഉപയോഗിച്ചാല്‍ പിഴത്തുക അഞ്ച് കുവൈത്ത് ദിനാറില്‍ നിന്ന് 75 ആക്കി ഉയര്‍ത്തിയിട്ടുണ്ട്. സീറ്റ് ബല്‍റ്റ് ലംഘനത്തിന് 10 ല്‍ നിന്ന് 30 കുവൈത്ത് ദിനാര്‍ ആക്കി. അശ്രദ്ധമായ ഡ്രൈവിങ്ങ്, ചുവപ്പ് സിഗ്നല്‍ മറികടക്കല്‍- പിഴത്തുക മൂന്നിരട്ടിയാക്കി ഓരോന്നിനും 150 കുവൈത്ത് ദിനാര്‍ വീതം ആക്കി. സ്വകാര്യ വാഹനം ടാക്‌സിയായി ഉപയോഗിച്ചാല്‍ 150 കുവൈത്ത് ദിനാറും ഈടാക്കും. അമിത വേഗത- 70 മുതൽ 150 കുവൈത്ത് ദിനാര്‍, റോഡുകളിലെ അനുവദനീയ വേഗപരിധിയ്ക്ക് താഴെ വാഹനമോടിച്ചാല്‍- 30 കുവൈത്ത് ദിനാര്‍, ലൈസന്‍സ് കൈവശമില്ലാതെ വാഹനം ഓടിച്ചാല്‍ 75 കുവൈത്ത് ദിനാര്‍, 10 വയസ്സില്‍ താഴെയുള്ള കുട്ടികളെ വാഹനത്തിന്റെ മുന്‍വശത്തിരുത്തി യാത്ര ചെയ്യുക അല്ലെങ്കില്‍ പിറകിലെ സീറ്റില്‍ അശ്രദ്ധമായി കുട്ടികളെ ഇരുത്തുക, ഗതാഗത ലൈന്‍ തെറ്റിച്ച് വാഹനം ഓടിക്കുക- 50 കുവൈത്ത് ദിനാര്‍ എന്നിങ്ങനെയാണ് രാജ്യത്തെ പുതിയ ഗതാഗതനിയമപ്രകാരം പിഴ ചുമത്തുന്നത്.
Comments (0)