ഈ പെരുന്നാളിന് കുവൈത്തിലെ ദരിദ്ര കുടുംബങ്ങളിലേക്ക് ബലി മാംസം എത്തിക്കും

കുവൈത്ത് സിറ്റി: കുവൈത്തിലും അന്താരാഷ്ട്രതലത്തിലും വാര്‍ഷിക ഈദ് അല്‍ അദ്ഹ ബലി (ഉദിയ്യ) പദ്ധതി ആരംഭിക്കാന്‍ ഒരുങ്ങുകയാണെന്ന് സകാത്ത് ഹൗസ് ഡെപ്യൂട്ടി ഡയറക്ടര്‍ ജനറല്‍ ആദേല്‍ അല്‍- ജെറി. എല്ലാ വർഷവും ഈദ് അൽ-അദ്ഹ സമയത്ത് മൃഗങ്ങളെ ബലിയർപ്പിക്കുന്നതിന് സകാത്ത് ഹൗസ് പ്രതിജ്ഞാബദ്ധമാണെന്ന് അൽ-ജെറി ഒരു പത്രക്കുറിപ്പിൽ സ്ഥിരീകരിച്ചു. ഈദിന്റെ ആദ്യ ദിവസം മുതൽ, കുവൈത്ത് കന്നുകാലി കമ്പനിയുമായി സഹകരിച്ചാണ് പദ്ധതിയുടെ പ്രാദേശിക ഭാഗം നടപ്പിലാക്കുന്നതെന്ന് അദ്ദേഹം വിശദീകരിച്ചു. “അന്താരാഷ്ട്രതലത്തിൽ, നിരവധി ആഫ്രിക്കൻ, ഏഷ്യൻ രാജ്യങ്ങളിൽ സകാത്ത് ഹൗസുമായി പ്രവർത്തിക്കുന്ന ലൈസൻസുള്ള ചാരിറ്റബിൾ സംഘടനകൾ വഴി, ആ രാജ്യങ്ങളിലെ കുവൈത്ത് എംബസികളുമായി ഏകോപിപ്പിച്ച് പദ്ധതി നടപ്പിലാക്കുമെന്ന്” അദ്ദേഹം വെളിപ്പെടുത്തി. കുവൈത്തിൽ, ബലിയർപ്പിക്കുന്ന മൃഗങ്ങളെ അറുക്കുകയും കശാപ്പ് ചെയ്യുകയും പാക്കേജ് ചെയ്ത് ഭക്ഷ്യസുരക്ഷാ മാനദണ്ഡങ്ങൾക്കും ഗുണനിലവാരത്തിനും അനുസൃതമായി സൂക്ഷിക്കുകയും തുടർന്ന് സകാത്ത് ഹൗസിൽ രജിസ്റ്റർ ചെയ്തിട്ടുള്ള യോഗ്യരും ദരിദ്രരുമായ കുടുംബങ്ങൾക്ക് വിതരണം ചെയ്യുകയും ചെയ്യുമെന്ന് അദ്ദേഹം കൂട്ടിച്ചേർത്തു.